Der Oberscht Seckelmäischter, dä wo bim Bund luegt, as mer nit am Hungerduech naage, hed die letscht Wuchen öbbis gsäit, won er churz druufaabe wiider beröit hed. Oder wie me hütte säit – relativiert hed. Glyych ischs enere Aargauer Grossröötyyn gange. Sii hed der Klimawandel mit em Film «Ice Age» vergliche. Cha jon emool bassiere. Gscheech nüt Schlimmers. Äi wichtigen Underschiid zwüschen em Finanzminischter z Bärn und der Jumpfere us em Aargau gits allwääg scho. Der Seckelmäischter luegt wohrschyynlig weeniger Zäichedrickfilm – höchschtens Dagobert Duck, der gyyzig Gäldscheffler.
Seckelmäischter = Kassier
Am Hungerduech naage = Not leiden
