Me ruumt wiider uuf. Wie me richtig uufruumt, zäigt e Japanerin jetz sit Nöischtem sogaar im Fäärnseh. Au em Noldi sy Frau, s Huldi vom Chlöpfgatterhoof, ruumt uuf. Numme brucht sii doo derfür käi Aaläitig. Soo hed au em Noldi sy Lieblings-Chutte müese draaglaube. Won er wiider emool im «Löie» am Ramse gsii isch, hed sy Frau, zääme mit andere alte Chläider, sy liebscht Chüttel der Chläidersammlig mitgeh. Wo der Noldi noonem Jasse häi choo isch, säit er zum Huldi: «Jetz han ich grad e Maa vo der Chläidersammlig gseh, wo der glyych Chüttel aaghaa hed, wien ich äine haa». S Huldi hed numme gschmöllelet und gsäit: «Soo, soo. Häit diir zwee der glyych Gschmack.»
Ramse = spezieller Jass
schmöllele = schmunzeln
