Die letscht Wiehnecht hed der Peter* s erscht Mool sy nöi Fründyyn mitgnoo. Mer häi öis scho an die äint oder ander kurligi Jumpfere müese gwöhne. Hüür ischs aber e ganz Spezielli gsii. Si chunnt vo der Stadt und isch 24. «Ich bi im Fall no am studiere», hed sii bi der Begrüessig gsäit. Fäärnöschtligi-Dieffepsychologie und Afrikanische früehchrischtligen Abstraktismus. Das hed me ren au aagseh. Si hed Hoosen aghaa und drüber son e Minijup, wo mii e chly an barchig Baloonstoff gmahnt hed. Die faarpigi Bluuse hed si wohrschyynlig imene Secondhand-Laade gkaufft. Ihri Hoor, e zümftige Höiel, häin e röötlige Schimmer ghaa, as öb si d Fäckte churz vor em Bsuech mit Doon-Ärden yygriibe hätti. Aber wie hed d Groossmuetter albe gsäit: «D Hauptsach, si sy suuber – d Hoor».
«Gschänk han ich käini mitbrocht», säit si bim Aanesitze vor em Wiehnechtsbaum. Sii syg en Altruischtin (sälbschtloosi Frau), wo käini Gschänkli verdäili. (Numme nääbenyyne: Öisi Gschänk hed sii denn schlussemänd glyych gnoo). Sii hed öis lang und bräit erklärt, ass das mit der gegesyttige Schänkerei nummen Unfriiden uslöösi und apgschafft ghört. Au s Wiehnechtsässe hed e groossi Diskussion uusglööst. «Fläisch ässe syg jetz aber esoo öbbis vo ˂out˃», hed si gsäit, wo d Frau die düre Böhnli mit em Rollschinggli serviert hed. Vegan syg im Momänt «in». Aber nit so hundskommuune Veganismus. Si häig nämmlig in der Zyttig glääse, ass me zum Byspiil z London scho nümm chönni mit normalem Veganismus aagee. «S Aagsäitischt syg im Momänt Hochland-Sparglen us Peru und d Bletter von ere thäiländische Blueme mit em interessante Naame «Clitoria ternatea». Ich haa gsäit, öbs ächt nid e chlyy wytt ewägg syygi, für deere Züüg yyzfliege. «Nüt doo», hed d Fründin vom Peter gmäint. «Fläisch ässen isch Mord. D Zuekumft lytt bim Pflanzenässe.» Doo han ich s escht Mool s Gfüehl ghaa, was es für e Chrampf mues syy, allewyyl welle Rächt haa und mit was für ere Sälbverständligkäit d Fründyyn vom Peter aanimmt, ass sii – und numme sii – rächt hed.
D Jumpfere hed numme Böhnli gässen und der Peter hed alsfott gröösseri Auge gmacht. Glyy isch d Diskussion bi der Flüchtlingskryyse gsii. «D Politiker und alli Parteie sett me verbiete», hed d Fründyyn vom Peter im Yyfer in d Rundi gworfe. «Me sett de Zyttigen und em Fäärnseh verbiete, vor allem über bürgerligi Politiker z schryyben und z sände.» Wo der Peter gsäit hed, ass das jo wie z China weeri, wo der groossi Voorsitzendi au säägi, was rächt und was as falsch isch. Er glaubi au nit, ass s guet uusechiemi, wenn s alsfott meh Lüt geebi, wo mäine, ass numme sii rächt heebe. Wie chunnt das au uuse, wenn underäinisch alli Menschen uf der Wält rächt hätte. Denn chönnte die, wo mäine sii häigen allwyyl rächt, deene wo Unrächt häi, nümm d Wält erklääre.
Au ich ha gärn rächt und behaupt jetz doo, ass an der nöggschte Wiehnecht em Peter sy fundamental vom Rächt überzüügti Fründyyn nümm mit ihm zäämen isch. Mer wäi luege.
*D Nääme häi nüt – oder ämmel fascht nüt – mit Mensche z due, wo no lääbe.
