Allewyyl wird gege s Deelefoon, im Spezielle gege s Handy, gwättered. Numme. Die letscht Wuche isch miir wiider äinisch bewusst worde, wie wichtig son es Deelefoon isch. Es isch im Zuug gsii. Der Kondiktör hed Billet-Kontrolle gmacht. Underäinisch lüted sys Handy. Sy Frau isch draa. Will der Kondiktör eso lut gschnaablet hed, häi alli im Zuug verstande, as sy Frau der neecher Daag zur Schwangerschaftsundersuechig mues. Stelled öich emool vor, der Kondiktör hätt käis Deelefoon by sech ghaa. Mir hätten alli nit gwüsst, as sy Frau in der Hoffnig isch.
underäinisch = unvermutet
schnaable = viel und schnell reden
in der Hoffnig = schwanger
