Sappermänt. Was häi die z Lieschtel wiider für es Gnuusch im Faadezäinli. Me cha lääse, as d Regierigsröötene vo der Bou- und Umwältdiräkzioon mit em Scheff vo der Baselbieter Wirtschaftschammere schyyns e chly z fescht gnööchberlet häigi. Jetz isch Füür im Dach – und zwar zümftig. Bananerepublik, Bschiss, Ärdbeebe, döönts vo alle Sytte. Aso fascht vo alle Sytte. D FDP säit gar nüt, schlussemäänd isch d Frau Regierigsroot…, aber löi mer daas. Ich bi gspannt, wie die wiider us dem Wullechnöiel uusefinde. Aber es isch dänk wie allewyyl. Zerscht es groosses Gschnuur und nooneme Rung isch wiider Friide.
Gnuusch im Faadezäinli = Unordnung im Fadenkorb
Sappermänt = Donnerwetter
