D Boscht-Autibus AG hed im Momänt schyyns e chlyy Brobleem mit der Kontrolle vo der Kontrolle. S Chrüsch, wo sy vo öis überchömme, as sy chönne in hinderscht und letschte Chrache hotzle, syg nit ans rächt Oort aanegflosse. D Kontrolle häig versäit. Aso doo mues ich wiiderspräche. Bi mir hed d Kontrolle vo de Boscht-Kontrollör klappt. Ich ha ämmel e Lohnuswyys vo der Boscht überchoo, as ich joo die 820 Franke, won ich fäärn bim gääle Riis verdient haa, au ordnigsgmäss due verstüüre.
Chrüsch = Geld
hotzle = rüttelnd und schüttelnd fahren
