Ich bi allwääg nit der äinzig, wo noonem Sylveschter s Altglaas entsoorggt. Aso äifach esoo gang ich natüürlig nit go entsoorgge. S bruucht schon e chlyy Druck vo myner Frau. Es isch jetz aber au nit esoo, ass sich bi öis d Gleeser und d Fläsche bis under d Decki stapple. Joo, ich gibs zue. Gleeser hets nit so vill zum in d Altglaassammlig z chaare. Sy halt scho eenter Fläsche. Wyyfläsche.
Ich pack also die Dääsche mit em Glaas ufs Veloo und mach my uf e Wääg. Z früeh darf me nit goh, nit ass d emänd d Noochbere mit däm Geklimper uufwecksch. Z spoot isch aber au nit guet, wil dy denn der Noochber froggt: «Soo, Herr Oberer. Häi mer em über d Feschtdääg e chlyy gee?» Do nützts au nüt, wenn de säisch, ass das s Altglaas vom letschte halbe Johr isch und ass den äinewääg fascht numme Gumfigleeser am Entsoorgge bisch.
De fahrsch aso süüferlig Richtig Altglaasdeponyy bi der Allmed und gisch acht, ass de bi de berüemte «Alice»-Schwelle käi Fläsche verliersch. Wenn dört aachoo bisch, ohni ass den e Guttere verloore hesch, stuunsch e chlyy über die nöii, modärni Sammelstell. E gattligi Sach. Und erscht no Underflur. So noonem Motto: Der Apfall isch allewyyl no doo, aber me gseht en nümme. Es isch alles schöön suuber und guet aagschriibe. Soo, ass au der hinderscht Chnulleri merkt, won är syni Guttere mues entsoorgge. Es geeb jo schyynts Mensche, wo numme wääge däm Wyy drinke, ass sy noochaane die leere Guttere so richtig zümpftig chönnen in Container bäängle, ass s so richtig schäärbelet.
Ich chumm bim Entsoorggen allewyyl e chlyy ins Sinniere. S goht mer s äint oder ander dur e Chopf. Zum Byspiil, ass mir Glaasentsoorgger jo no Glück häi. Deene mit de Hundeseckli gohts düttlig dräckiger. Die wüsse nümm wo aane mit em Gaggi vo ihrem Liebling. Über Nacht het d Gmäin bekanntlig alli Hunde-WC ufghoobe. Me mües halt spaare, säit der Gmäinroot. Überhaupt. Spaare. Au die öffentlige WC sellen ufghoobe wärde. Derfür sell men in de hiesige Bäize go versüüfere – gege Bezaalig natüürlig. E gueti Idee – denn hets, ämmel imenen Däil vo de Bäize, mindeschtens äi Gascht – au wenn er nummen ufs Hüüsli goht. Und s Bescht: S Hundeseckli chan er au graad no mitneh. E Toilette-Spezialischt säit däm glaub modärne Toilette-Tourismus. Das eröffnet ganz nöii Perschpektive für Sissech, wo jo scho mit deeren Underflur-Entsoorggig nöii Wääg gangen isch.
Noodäm die zwee Apfall-Fetischischte vo Bryyslach die alti Dabeete vo ihrer boufellige Hütte z Sissech imene Biotop entsoorggt häi, cha me zuekümpftig daas, wo me nümm bruucht, in ere hiesige Bäiz d Toiletten aabespüele. Bim Uusegoh chasch denn der Sissecher-Schyyssi-Entsoorggigs-Bass lo abstämple. Isch d Charte voll, chunnsch bim neechschte Bsuech, das häisst, wenn de zum Byspiil der Goldfisch oder d Springmuus wetsch d Schüsslen aabeloo, e Guetschyyn für es Toilettebürschteli mit ächte Söiborschten über.
