Es git se halt doch – die kulturellen Underschiid zwüsche de Stedter und de Landschäftler. Uf der äine Sytte der Sissecher Metzgermäischter, won en öffentligi Metzgete blaant. Es git e riisen Uufruer und Ghoop. D Präss schlachtet – näi, nit d Sou – die Gschicht wäidlig uus und d Stedter brüele typisch Rammler. Mer häis jo immer gsäit. Die sy doch no hindedryy. D Basler zäige, wie mes au cha mache. Dört schlöien e baar Fuessballdotteli noonem Spiil en Yysebahnwaage churz und chlyy. Das isch denn ebe die anderi Kultur.
Ghoop = Geschrei
wäidlig = rasch
