Und wiider äinisch gääbe d Beebi und d Rammel enander Zunder. D Partnerschaft liggi – äimohl meh – im Aargge. D Stedter byggiere sich under anderem über die ändloosi Diskussion über d Finanzierig vo der Univärsität und der Kultur. Joo, Kultur isch es guets Stichwort. Kultur weeri, mitänander z schwätze und nit z döipele wie halbverdrochneti Mymöösli. Zum Byspiil binere Metzgete, wenn d Basler in Schaaren ufs Land fahre und bi Bluet- und Lääberwürscht, Lääderöpfelschnitz und emene halbe Roote merke, as d Landschäftler gaar nit so Ungschickti syy – ämmel bim Wurscht(l)e.
byggiere = ärgern
döipele = trotzen
