Der Miggel vo der Chlöpfgatter-Clique isch am Fasnachtssunndigzoobe z Sissech am Stroosserand gstande und het uf e Facklenumzuug beited. Drummlend und pfyffend isch d Nuggi Clique, won em Umzuug voorusslaufft, d Ryyfälderstrooss deruff choo. Doo säit underäinisch e Fremde, wo nääbem Miggel stoht, in bräitem Baseldü(y)tsch: «Ich ha gaar nit gwüsst, as bi eych Rammel au drummled und pfiffe wird.» Doo isch er aber bim Miggel an Falsche groote: «Loos, du Zuttel. Die Clique, wo de doo ghörsch und gsehsch, isch 90 Johr alt. Doo häit dir bi öich in der Stadt noonig emool gwüsst, wie Drummelschleegel usgseie.» Denn isch rueig gsii, ämmel bim Bebbi, und der Miggel hed sich wiider chönnen uf en Umzuug konzentriere.
beite = warten
Zuttel = geistig beschränkter Mann
Ein Kommentar
besser: mit Drummlen und mit Pfyffe isch d Nuggi Clique….
vyle Dangg für die immer originelle Gschichte