Duuregchnätted

Nundefaane. Was für es Wellness-Hotel. Mit emene Schwümmbaad dusse (ghäizt) und dinne (nit ghäizt). Drei verschiidnige Saunas. E huffe Rüüm, mit künschtligem Liecht und samfter Muusig, wo me sich cha lon e Guggummere-Masken uflegge, d Zeecheneegel lo schnyyde, d Wimpere lo zupfe, e Thai-Yoga-Massage «Nuad Phaen Boran» oder e Klangschaale-Massage gniesse, wo de fascht füdleblutt uf emene Schraage lysch und e huffen anderi Aawändige. Aawändige, wo de noochaanen öbbe 20 Johr jünger uusgsehsch. Säit men ämmel.
E Guggummere-Maske han ich käini lo uuflegge. De bisch jo nie sicher, öbb die gschyyblete Guggummere noochaanen as Salaat uf em chalte Büffee aadriffsch. Ich ha mi für e Ganzkörpermassage mit «… speziellen Grifftechniken wie zum Beispiel Streichungen (Effleurage), Knetungen (Petrisagen), Reibungen (Friktionen), Rollungen und Schüttelungen…» entschiide. Vorgstellt han ich mir, ass mer e Tiroler-Jungfrau samft über e Rugge strycht und ich derbyy seelig yyschlooff.
Läider ischs denn e chlyy anderscht choo.
Im Spa & Beauty-Beryych hed mii es nätts Frölläin empfange. Öb die jungi Daame no Jungfrau gsii isch, han ich mii nit gedrout z frooge. «Ahaa», hed si gsäit, «dir sytt jetz der Herr Oberer.» Si hed e Chriibel uf ihrer Lyschte gmacht und gsäit: «Der Sepp chunnt graad.» Sepp?, han ich dänkt. Nit Vroni, Resi oder sünscht e gattligi Jumpfere. Denn isch d Dür ufgangen und der Sepp isch vor mer gstande. Mi hets dunkt, es isch fascht e chly dunkler worde, so vill Schatte hed dä stattlig Maa apgee. Er hed mer d Hand gschüttled und mii früntlig begrüesst. Spööteschtens bim Handschlaag hätt ich selle vorsichtig wäärden und die Massage-Üebig apbräche.
Nüt do, han ich mer gsäit. Doo mues der Oberer jetz duure.
Und wien ich duure ha müese. Ohni lang Laarifaari z mache hed der Sepp loosgloo. Mit syne groosse Händ und vill Chraft, hed är myni beschäidene Müskeli duuregchnätted. Han ich am Aafang vo der Behandlig mit mym Tiroler-Muni no greedet, bin ich mit der Zytt alsfott rüeiger worde. Noonere Stund bin ich erlööst gsii und ich haa – ohni fremdi Hilf – chönne vom Schraagen aabechläädere.
Dä Maa hed sicher nüt falsch gmacht. Wohrschyynlig syy äifach myyni Wäädli, d Oberschänkel und der Äckte nit gmacht, für eso duuregwalcht z wäärde.
Sit däm Aagriff uf my Körper, han ich e ganz anderi Vorstellig vo Wellness. Äinewääg. In der Zwüschezytt chan ich wiider lauffe, d Ärm beweegen und am Moorggen elläi zum Bett uus. Das isch doch au en Art Wellness – oder öbbe nit?
Nääbenyyne. Der neecher Daag isch my Kolleeg, dä, wo mii usglache hed wääge myne Schmärze, uf em Schraage vom Sepp glääge. Wies ihm ergangen isch, gseiet der, wenn der e Maa dräffed, wo süüferlig und an zwee Stäcke dur e Strichcode chruckled.