Ou, sy das no Zytte gsii, wos im Militär no zümpftigi Choscht gee hed. Chees- und Fotzelschnitte, wos Fett nummen eso aabedropft isch. Oder wenn der Chuchischeff vor em fakultative Nachtässen e raue Chuttleblätz ans Aaschlaagbrätt gnaaglet hed, as jo käinen uf d Idee choo isch, zum Ässe wellen in der Kasärne z blyybe. S Ragout isch vonere 25-jöhrige Chue gsii und hed öbbe 36 Stund gkocht, bis as es lind gsii isch. No Daage spööter hesch vo däm Chueringgel zwüsche de Zehn ghaa. Hütte wird im Militär Mah-Mee, Auberginegratin oder Chinapfanne aabotte. Ich froog mi numme, wie me mit deene Gricht im Buuch will der Chrieg günne.
Fotzelschnitte = in Eierteig gebackene, mit Zucker und Zimt bestreute Brotschnitten
lind = weich
