Im Fitnesscenter. Under der Duschi. Gsprööch so zwüsche Maa und Maa oder anderscht gsäit, zwüsche Ranze und Ranze. «Jetz lueg emool my Wanscht aa», säit en öltere Maa, won e güggelroote Chopf hed. «Jetz gang ich drüümool in der Wuche doo aane und der Ranze wird nit chlyyner.» Ich sääg zuenem: «Muesch halt es Bier weeniger drinke.» Jetz isch der Mölli vom Altdurner no rööter worde und er hed ummegeh: «Wenn ich käi Bier me cha drinke, bräch ich die Hantlestämmerei dutzwytt ap.» Rächt hed er.
Fitnesscenter = Bi däm Wort stoosst d Baselbieter Mundart an ihri Gränze. Gits äigedlig nit uf Mundart. Früehner isch me, statt ins Fitnesscenter go schwitze, go höie.
Wanscht = dicker Bauch
Mölli = dicker, runder Kopf
