Äi groossi Froog isch no allewyyl nit beantwortet: Worum löie die mäischte Manne d Düren uf s Hüüsli offe, noodäm si s Gschäft verrichted häi? Es mahnt äim fascht e chly an d Chüe, wenn sy am Moorgge zum Stall uusetschalpen und s Chuegatter nit hinder sich zuemache. Numme, d Chüe, die sy entschuldiged. Die häi nie glehrt, wie men es Gatter zuemacht – im Gegesatz zu de mäischte Manne.
Wo die Düren isch, wo s in deere Gschicht drumm goht, isch in däm Zäämehang nit wichtig. S cha iggs e Düre syy. E Düre, wo dir öich velicht au scho gfroggt häit, worum die immer offen isch und s wäägedäm in der Geegend ummemüffelet. Es wytters groosses Brobleem: s Wächsle vo der Toilette-Rolle – aso, wenn äin s letscht Blatt vo der Rolle gnoh hed – wäi mer zumeme spöötere Zyttpunkt aphandle.
Sits Mensche git, mues s Züüg, wo me gässe hed irgend äinisch hinden uuse. Die lengscht Zytt hets käi Rolle gspiilt, wo und wie me sys Gschäft verrichted hed. Me hed äntwääder hinder e Stäi oder über d Burgmuure gmacht oder isch ap in d Büsch.
Denn, es isch dänk äin vo den erschte Gsundhäitsfanatiker gsii, isch s Plumskloo erfunde worde. Denn s Toilette-Bapyyr und drufaabe d Toilettedüre. Bi den erschte deere Holzdüre, und wils jo no käini Väntilatore gee het, hed men es Härz uusegnäggled. Soo isch der Gschmack nit drinne bliiben und s isch niemer verstickt.
Noodisnoo sy d Toilettedüre raffinierter worde – aber zuemache hed me sen immer chönnen oder selle. Schwingdüre, Flügeldüre, Klappdüre, Holz-, Blaschtig- oder Kunschtstoffdüren oder, wie non in e Däil Länder: e Sack vor em Hüüsli. Die mäischte Düre sy nit würklig bsuecherfründlig gsii, wils der sen äntwääder an d Scheichen oder an Bölderi bänglet hed.
Denn isch iggs son e Schlaumäier uf d Idee choo, Gäld z verlange, wenn me sys Gschäft öffentlig isch go verrichte. E Toilette, wo de hesch müesen e Batzen yyneloo, ass de hesch chönnen uf e Droon chläädere. Das hed aber chönne zue wüeschte Maläscht füere. Zum Byspil denn, wenn de no drei Däller Schnitzunddrunder churz vor em Chlütteri uf em Bahnhoof vor der verschlossene Toilette-Düre gstande bisch und käi Münz im Sack gha hesch. Aber au die Düre, wenn me denn yynechoo isch und men nit voorhäär in d Hoose gmacht hed, hed me non em Hüüsli-Bsuech zuegmacht.
Denn isch d Hygiene alsfott wichtiger worde. Duftsprei in alle möglige Düft sy in Mode choo. Handwäsch-Seminar, gläitet vo usgwiisene Wäschdüechli-Guru, sy us em Chrutt gschosse. S Toilettebapyyr isch mehrlagig worde mit de verrücktischte Muschter druff. Das zäigt, ass men us allem chan es Gschyyss mache.
Aber öbbis isch bliibe, ämmel wenns um d Hüüslidüre goht: Alle Nöierige z drotz, noodäm men uf em Hüüsli gsii sich, macht me d Düre hinder sich zue. So äifach isch das.
