Hützedags hed Maa nit äin oder zwee, näi, hützedags hed Maa oobenewägg drei Grill. Äigedli e riise Entwicklig, wenn me dänkt, as d Neandertaler syynerzytt nummen äis Füür ghaa häi. Ganz bsuundrig gohts zue und hääre, wenn Maa e Grill chaufft. Der Grillmäischter will nämmlig genau wüsse, wien er mit sym nöie Grill chan es Okapi schöön saignant bröötle. Der Verchäuffer, wie chönnts anderscht sy, hed uf alles en Antwort. Im Hindergrund stoht d Frau und loost däm Gsprööch es Wyyli zue, denn säit sy: «Schatz, mer häi doch scho drei Grill. Mäinsch nit, as das läängt?» Doo dräit sich der Maa umm und pfüüsd: «Du hesch au öbbe 37 Bluuse und chauffsch jeedes Johr guet und gäärn zwölf nöji.» D Frau hed e Möltsch gmacht und der Maa hed der Grill gchaufft. Der viert.
hützedags = heutzutage
oobenewägg = mindestens
syynerzytt = damals
pfüüse = zischen
