Me darf efange nüt me. S isch doch au wohr. Jetz will me emene Däil Schüelermäitli und – bueben am Gym z Lieschtel s Schwänze verbiete. D Schüeler sellen äifach in d Schuel, wenns ihne grad dernoo isch. Numme: Chunnt dä Voorschlag duure, goht wiider es Stück Kultur verloore. Es Stück Entschuldigungs-Kultur. Wie hed me doch amme müese nach Uusreede suche, wenn äim d Lehrere uf e Sack gangen isch mit ihrer eebige Singerei. Oder wenn me mit de Mäitli hätt zääme selle durne. Die häi jo nit emoll der Fälgufschwung chönne und häi allewyyl numme dumm giigeled. Das mit de Mäitli hätt der Vatter jo no verstande, aber d Entschuldigung hed är äinewääg nit underschriibe.
eebig = ewig
giigele = kichern
