Ich ha mi gfroggt, wie me das jetz äigedlig mues verstoh. Fascht überall chunnt fascht alles numme no us der Region, und jeede kennt jeedi und umgekehrt. Am mäischten über d Region schwätze d Bäizer in der Region.
Es isch nooneme feine Znacht gsii bim Sepp in der «Fäisslächtige Bluetwurscht» z Ringgelbachhoofe. Noonem Desseer, emene gattlige Meeräng, isch der Sepp zue öis an Disch ghockt. Er hed ganz verschwitzti Hoor gha. Gschmöckt hed er e chly wie apgstandnigi Pommes Frites. Derfür hed är e früschi Chochbluusen aaghaa. Wohrschyynlig hed die alti – aso d Chochbluuse – uusgseh wie d Uniform vomene gfallenen Äidgenoss bi der Schlacht vo Marignano.
Mir häin em es Komplimänt gmacht und ihn grüemt, wie guet ass s Ässe gsi isch. Bsunders die brootnige Schwyynsnierli anere Sämpfsoosse, der dämpft Fääderechöhl mit de Schunggemümpfeli draa und die brääglede Häärtöpfel häin en uusgsuechti Güeti ghaa.
Soo. Jetz isch der Sepp aber in Fahrt cho. Är geeb sich halt bsunders Müei bi der Uuswahl vo de Liiferante. Är kenni alli persöönlig, syg mit allne per du und si chiemen alli us der Region. S glyych sygi mit de Lääbesmittel. Au doo kenni är jeedi Sou, jeedes Huehn und jeede Güggel persöönlig, wo bi ihm in der Pfanne landi. Au zu de Chälber, Rinder, Rösser, de Fisch und de Chüngel häig är es persönligs Verheltnis. Sogaar mit de Schwyynsnierli syg är fründschaftlig verbunden und döig ene guet zuereede, bevor är se mit emene ghüftige Mocken Anken in der Pfannen aabrooti.
Mir häi numme no Muul und Ohren uufgspeerrt. Insghäim han ich mi gfroggt, was der Sepp zum Fääderechöhl gsäit hed, bevor är ihn ins häiss Wasser dunkt hed.
Der Sepp isch aber noonig fertig gsii.
Au zue der Yyrichtig, aso zue de Disch, bsunders zum Stammdisch, zue de Stüehl, zum Buffet, zue de Vorhäng, äifach zu allem, häig är e persöönligi Bezieiig. Oder anderscht gsäit, er kennt jeede Schryyner, Gipser, Muurer, äifach jeede Handwärker persöönlig, und wichtig: Au die cheemen alli us der Region.
Wiider han ich mir überläit, was ächt der Sepp zue der Schyyssischüssle säit, wenn är ammen am Moorgge d Toilette butzt. Joo. E Butzfrau hed är nämmlig e käini, wil är käini persöönlig kennt und die allwääg soowiesoo nit us der Region cheemi.
Noonem vierte Burgermäischterli han ich der Sepp gfroggt, öb das nit e chly aasträngend syg, zu jeedem und zu allem es persönligs Verheltnis z haa. Schlussemäänd döig är jo Daag für Daag e Huffe verschiideni Sache bröötle, dämpfen oder bräägle. Öb är do nit der Überblick verlieri.
Näi, mäint är. Nummen äinisch, nämmlig zu syner Frau, häig er underäinisch nümm son es guets persönligs Verheltnis ghaa. Drumm syg är jetz elläi und müesi s Pissoir halt sälber butze.
