Äigedelig isch s Reschtbroot vo de Spyyscharte in de Bäize verschwunde. Vor Johre no hets nachere Beäärtigung bim Lyychemohl ammen es Reschtbroot gee. Früschs, chrooschpeligs Broot mit zümftig Anke druff und beläit mit Schungge, Schwaartemaage, Zungewurscht und no wyttere, chüschtige Würscht. As Garnitur isch oobedruuf e Doomateschnitz, e halbi Salzgurke und es Büscheli Beeterli glääge. Jetz bin ich do letschti inere Bäiz gsi, wos Reschtbroot mit vegetarischem Uufschnitt im Aagebot gha hed. Aso, das mues jetz nit syy. Denn lieber käis Reschtbroot as äis mit noochegmachte Würscht.
Uufschnitt = in dünne Scheiben geschnittene, kalte Wurstwaren
Reschtbroot = ein Stück Schwarzbrot, grosszügig mit Aufschnitt und Käse belegt
chrooschpelig = knusprig
