So noodysnoo nähme sy öis alles ewägg. Aagfange hets mit de «Baselbieter Rahmtäfeli» oder Ruundääfeli, wie mir würde sääge. Vor sächs Johr hed d Läckerli-Huus-Scheffin äifach s Wort Baselbiet bi de Dääfeli gstriche – aso der Ruun afen apgnoo. Und jetz chömme d Bebby draa. Glyy häisse nämmlig die «Echten Basler Leckerli» bi äim vo de Grossverdäiler numme no «Feinste Leckerli». Jetz gohts allwääg nümm lang, as son e Gschwälli der Basler Fasnachtsmarsch «Läggerli» in «Feinste Leckerli Musik» umdauft.
noodysnoo = nach und nach
der Ruun afen apgnoo = das Beste ist weg
Gschwälli = Angeber
