Die wichtige Sachen im Lääbe

Hüür am 1. Juni, 17 Johr noo der erschte Sprängig im Hauptstolle, wird der lengschd Yysebahndunnel vo der Wält eröffnet. 57 Kilometer lang isch er dä Dunnel und hed 12 Milliarde Franke koschted, wo glyy die erschte Züg mit 200 Stundekilometer derduur chläppere. Es riise Bouwärch, wo mer alli dörfe stolz sy druuf.
D Gfohr bi so riisige Bouprojekt isch aber grooss, ass dernääbe die chlyyne Sache vergässe gönge. Drum wett ich doon e Gschicht verzelle, won em Noldi vom Chlöpfgatterhof bassiert isch, won er do letschti mit der SBB underwäggs gsi isch.
Är isch uf em Wääg zum Dokter gsi, won er zunere Darmspieglig aagmääldet gsi isch. Nüt Aagnääms. Underem Daag hed er verschiideni Sache müese zu sich nee, ass bi der Spieglig alles glatt goht. Alli, wo sone Prozeduur schon emool häi müesen über sich lo ergoh, wüsse, wie unaagnähm das isch.
Zimmlig närvöös isch er uf em Bahnhof gstanden und hed uf e Zug gwaardet. Aber uusgrächnet hütt hed dä Verspöötig. Der Noldi isch immer närvööser worde, wil är dringend ufs Hüüsli hätt sellen und nienen en Ort gsi isch, won er sich hätt chönnen erlychtere. Noonere Viertelstund isch statt em Schnällzug e Bummler choo. Das hed bedüted, ass d Räis no lenger duured und der Noldi no länger hed müese verchlemme.
Wo der Zug, wo mit gyyxende Bräämsen aaneghöterled isch, äntlig ghalte hed, isch der Noldi mit zimmlig Druck uf der Läitig yynegstürmt und hed sich wien e Gstörte uf d Suechi no der Zugstoilette gmacht. Derbyy hed är d Füdlebacke schon e chlyy müese zäämedrücke, ass joo käis Unglück bassiert isch. Und denn bassiert das, wo jeedem, wo der Dürlischletzer hed, der Angschtschwäiss uf d Stiirne dryybt: «Toilette ausser Betrieb».
Mit schlottrige Chnüü und pflätschnass isch der Noldi imenen Egge gstanden und hed ghofft, ass niemer merkt, was für es Malör ihm grad bassiert isch. Won er denn äntlig hed chönnen uusstyge, isch er ganz süüferlig zum Dokter gwagglet, ass jo niemer merkt, ass er d Hoose voll hed. Derbyy hed är sich schuurig gschämmt und innerlig über d SBB gfluecht.
Bim Dokter hed är zerscht müese d Underhoose wächsle. S nätt Frölläin hed ihm guet zuegreedet, das sygi nit so schlimm und cheemi immer wiider öbbe voor. Das hed der Noldi aber nit würklig berueigt und er isch froh gsii, won er d Behandlig dure ghaa hed.
Won er sich wiider e chlyy erhoolt gha hed und nümm uf em Schraage gläägen isch, isch em Noldi der nöi Gottharddunnel in Sinn choo und er het sich gfroggt, öb ächt vor luuter Groossprojekt bi der SBB die chlyyne Sache vergässe gönge – wie zum Byspiil so äifachi Sache wien e Zugstoilette, wo funkzionierd.