Zerscht wird alles apgsperrt. Denn chömmen e huffe Brätscher und Mannos in orangschnige Gwänder, wo d Strooss ufrysse. Es wird bickled und gschuufled. Äin schlottered amene Brässlufthammer. Laschtwääge fahren aane und nääme der Dräck mit. Wenn das gsehsch, dänksch, jetz gohts nümm lang und d Strooss isch gflickt und der Randstäi isch wiider schöön ordeli aane. Aber underäinisch goht nüt me. Bim Kanton säit me däm: «D Boustell isch sischdiert.» Uf d Froog, worum d Boustell sischdiert isch, chunnt me d Antwort über: «Mir häi käini Stäi für e Randstäi.» Ahaa. Drum doon e Vorschlag: S neechermool erscht aafoh ufryysse, wenn d Stäi doo sy.
Brätscher = kräftiger Mann
Manno = tüchtiger Mann
ordeli = ordentlich
