Doo hed sich der Noldi vom Chlöpfgatterhoof wiider äinisch meh chönne gottsläschterlig ufreege. Jetz isch doch die letscht Wuche der Startschuss zum Bou vo der 500 Millione Franke düüre Bölche-Sanierungsröhre gefalle. Au öisi Verchehrsminischteren isch bi däm Feschtakt derbyy gsi und hed: … Gfötteled. Wien e Gäggsnaasen isch sy z vorderscht vorne gstanden und hed mit ihrem «smartfone» im Gjätt ummegfuchtled. Nääben ihre sy mit verstäinerede Gsichter d Ingenieur, d Mineur und der Boufüehrer gstanden und häi sich allwääg e chlyy gschämmt. Jetz froggt sich der Noldi halt, öb die bim Kanton käini Fottigraafe häi, as d Verchehrsminischtere d Fötteli hed müese sälber mache?
gottsläschterlig = fürchterlich
Gäggsnaase = vorwitziges Fräulein
Gjätt = unwegsames Gelände
