Ahaa. D Umfahrig Lieschtel mues saniert wärde. Guet, alli chömmen äinisch ins Alter, wo der Lagg apblettered und d Fassaade nöi mues gstriche wäärde. Hoffe mir numme, as öisi diifigi Verchehrsminischtere gnue Zytt hed, sich däm Brobleem aaznee. Im Momänt wäibled si jo für e zwöiti Gotthardröhre. Aber si hed jo no der Ooberjuhee vo der Baselbieter Wirtschaftschammere, wo ihre cha sääge, us weelem Dunnelloch der Wind pfyfft. Oder velicht ischs au anderscht und d Jumpfere macht sich schlau, wie me z grächtem e Dunnel bout. S git nämmlig Lüt, wo z Lieschtel sääge, me sett es Dunnäll duur e Schlyffebärg bohren und dernoo die boufellig, alti Lieschtlemer Umfahrig aprysse. Ganz schöön raffiniert, was sich öisi Verchehrsminischtere doo usdänkt hed.
diifig = emsig
wäible = werbend umhergehen
Ooberjuhee = Chef
