Die Woche isch mer wiider äinisch meh klaar worde, wie wichtig as isch, as d Lääbesmittel richtig aagschriibe sy. Zum Zmidaagässe, my Frau hed e gattlige Wämpe Fläisch gmacht, hets Chrütteranke gee. Won ich d Verpakig vo däm Anken nööcher aagluegt haa, han ich chönne lääse: „Kräuterbutter mit Kräutern“. Ou, han ich dänkt. Jetz bin ich scho no froh, as nit Ziegelstäi oder Gumpischt drinn ghaa hed. Jetz gohts allwääg nümm lang, und me mues aaschryybe, as Milch in der Milch hed. Nit as äine, wo Milch drinkt und dervoo der Dürlischletzer überchunnt, reklemiert, er häigi nit gwüsst, as es Milch in der Milch häigi.
Wämpe = Stück
Gumpischt = eingelegtes Sauerkraut
