Hüür isch d Essig-Fliege bi öis nit grooss umme gsi. D Spezialischte mäine, der häissi Summer syg tschuld draa. Die soumeessigi Hitz häig de Männli vo däm japanischen Yydringling nit guet doo. Die verdrääge nämmlig numme chalts Wätter. Wenns so häiss sygi, döige die allwääg nöime blampig in der Chüeli ummehange. Und s isch wies isch: Ooni Männli gits käi Noochwuchs. Soo syge die wyybligen Essig-Fliegen ummesuscht ummeghääied und häige käini Äier chönnen aplegge. Und: Was säit öis daas? Ooni Männli – ämmel bi der Essig-Fliege – lauft gar nüt.
blampig = schlaff
ummesuscht = umsonst
ummehääie = umherjagen
