Baade

Früeijer hed äim der Leerer in der Baadi äifach ins Wasser gschosse, wenn me nit hed chönne schwümme. Die Zytte sy zum guete Glükch umme. Hütt bruuchts dooderzue nämmlig e lengeri Uusbiildig.
Iich mag mii no bsinne, ass mii der Leerer Müller, noodäm iich ums Verwoorgge nit ha wellen ins Wasser gumpe, am Schlawyttli pakcht und mii wiene zaablige Fisch ins Wasser gheit hed. Vor lutter Angscht han iich wiene laame Bärnhardyynerhund afo schwaaderen und wiene Häftlimacher uufbasst, ass iich mit em Chopf nit under Wasser chumm. Aber aaschyynend hets gnützt. Es goot ämmel in der Zwüschezytt efange ganz oordeli mit Schwümme, und der Chopf chan iich au under Wasser heebe.
Das isch s äinti, won iich mii im Zäämehang mit den erschte Schwümmversüech mag zruggbsinne. S ander isch s Baadiwasser gsii. Woorschyynlig hed der doomoolig Baadmäischter Wiszlo bii myym erschte Schwümmversuech grad s Wasser früsch yynegloo – es isch ämmel soumeessig chalt gsii – dänk öbbe dryzää Graad. Und denn isch no daas mit em Baabyyrlizäämelääse gsii. Häi miir junge Laaferi amme der Baadmäischter verrukcht gmacht, häi miir as Strooff, noodäm d Baadi z Oobe zue gsii isch, alli Baabyyrli müesen am Boode zäämelääse. Vellicht han iich hütt wäägedäm e Fötzeli- und Baabyyrli-Fobyy und liis immer wiider Apfall zääme, wo uf der Strooss ummelytt.
Aber jetz zrugg zum Schwümme. Wenn hütt e Leerer mit syyne Schüeler in d Baadi will, mues är lääbensrettigstechnisch guet uusbiildet syy. Doo längen e baar Bermudas-Baadhoose, en uufbumpte Gummipnöö oder e «Baywatch»-Rettigsring nümme. Ass är syyne Schüeler s Schwümme cha byybringe, mues är so öbbis wiene Regrutteschuel bsuecht haa. Numme nach soonere heerten Uusbiildig darf är vom Bekckirand us Schwümmunderricht gee. Äis Brobleem won är derbyy chönnt haa: Biim Schwümmunderricht ischs e chlyy wie biim Sexuaalunderricht: Die mäischte Schüeler chömme woorschyynlig besser druus as d Leerer – ämmel sicher biim zwöite.
Dorum goots bii deere Süesswassermadroosen-Uusbiildig au nit ums Schwümme. Näi, es goot um d Sicherhäit vo de Schüeler. Was doo nit alles chönnt bassiere. Es chönnt sich öbber vo de Bubertierende der Underlyyb verchölte. Oder s nöi Deelifoon oder s Imidazioons-Gutschidäschli wird füecht. Irgend sone Freizytt-Tarzaan chönnt e Ränzler oder en Arschbomben ab em Drüümeter-Sprungbrätt machen und sich derbyy am Fuudi wehmache, oder äis vo syyne beede Höörli uf synere Hüenerbruscht chönnts ewägg rasiere. Uufbasse mues der Leerer au, ass sich niemer s Muul an de Bommfrytt verbrennt und käini Syygerette-Stummel ins Wasser gschoosse wäärde.
So verchömme d Leerer alsfott mee zue Sicherhäitsbeamte, und s Schuelgee dritt in Hindergrund.