Drüü Joor hed er sich Späck aagässe, jetz maag er nümme. Iich mäin der.., wie häisst är jetz scho wiider? Wie gschnäll as doch goot, as men e Naame verschwitzt. Är schafft no bis Änds Juli bii der Baaselbieter „Volkswirtschafts- und Gesundheitsdirektion“ as, jä, as waas äigedlig? Was hed dä dört der lieblang Daag gmacht? Bim Staat! Dört wird doch schyyns mäischtens numme gwurschtled. Soo döönts ämmel duraane vo dere Bartei, wo dä derbyy isch, won iich nümm wäiss, wien er häisst. Und will är daas, won är dört gmacht hed, won iich nit prezyys wäiss, was daas gsii isch, so guet gmacht hed, darf är, won iich nümme wäiss, wien er häisst, no bis Änds Joor sym Noochfolger guet zaalti Kchunsyyne gee.
wurtschtle = ziellos arbeiten
Kchunsyyne = Ratschlag
