Äigedlig öbbis Äifachs, daas mit em Suppegmües. Es Rüebli, e halbe Stängel Lauch, e chlyyne Sellering, e chlyyne Chaabischopf, e chlyyni Ziibelen und es Loorbeerblatt imene Kchartondrückli miteme Gurit drüber. Us deene Sache, aso nit us em Gurit, macht men e chüschtigi Gmüessuppe –usser deene, wo Päkchlisuppe mache. Die bruuche käi Suppegmües. Uf myy Froog biimene Grosssverdäiler z Sissech, worums käi deere Gmües im Gstell hed, säit miir e junge, diifige Burscht, wo grad am Chruttstiil yynbebyygelen isch: «Im Summer gits käi Suppegmües.» Stäärnechäib, han iich dänkt. Erschtens isch jetz nit Summer und zwöitens: Weele düppelhürnige Sässelfurzer entschäidet, as iich im Summer käi Suppen iss? Nääbenyyne. Im Milchhüüsli hets denn Suppegmües ghaa. D Jumpfere dört chocht aaschyynend au im Summer Suppe.
Sellering = Sellerie
Chruttstiil = Mangold
