Scho my Groossvatter hed albe gsäit, as me bii der Uuswaal vo der Hochzyttere oder em Gspuuserech nie gnueg überläit chönni voorgoo. Das häi s letschte Wuchenändi au die Hoornibökch müesen erfaare, wo us Baasel und em Baaselbiet äis häi welle mache. Lueged. Das isch wie bii de Chüngel. Wenn d Haddle nit will, cha der Bokch no so umsenumme schlyychen und iire der Hoof mache – wenn sii nit rammlig isch, laufft gar nüt. Dorum liebi Fusioons-Zwängi: Wenn der wiider öpper wäit zäämebringe, dänket s neecher Mool äifach draa, was my Groossvatter gsäit hed.
Hochzyttere = Braut
Gspuuserech = Bräutigam
Hoornibökch = Trötzeler
Haddle = weibliches Kaninchen
