Er blybt mäischtens vergässe. Wird nämmlig nöimen es nöis Huus boue, schwätzen alli vo deene, wos Huus zäichnet, berächned und boue häi – und käi Sou inträssiert sich für dä, wo für d Boustelle-Muusig zueständig isch. Voor nämmlig d Boor-, Schlyff- oder Pflaschtermisch-Maschiinen aagloo wärde, entschäidet der Boustelle-Raadio-Verantwortligi, weele Sänder und wie lut as gloost wird. Jetz loot dä Maa aber nit äifach der Raadio aa. Näi. Är mues s Gspüri haa, wie lut as d Muusig mues syy. Schlussemänd müesen alli drotz im Bouläärm lut und dütlig ghööre, was grad für es Stück laufft. Isch es Stroossekaffi in der Nööchi, soorggt är derfür, as au d Lüt bim Kaffidrinken öbbis vo der Muusig häi. Gsäiet diir, esoo isch daas.
läärmidiere = beträchtlichen Lärm machen
voor = bevor
