Es isch es guets Doomaate-Joor gsii. D Stöck sy graagled voll gsii mit dene roote Baaradyysöpfel. Die, wo me nit hed mööge früsch ässe, hed men äntwääder yygchocht, e «Tomatenespuma», e Doomaate-Deryyne oder sünscht öbbis Apsunderligs druus gmacht. Derbyy gubtis e ganz äifachi Zueberätigsart, wo erscht no heerlig schmökt. Diir chochet d Doomaate mit Ziibelen und Choblech yy und würzet mit Salz, Pfäffer und früschem Basilikum. Nääbedraa döied diir e Schyyben alts Broot im Ankchen aabääie, wo diir dernoo mit de no warme, yygchochte Doomaate bestryyched. Oobedruuf chunnt denn non es Äierinankche vo glücklige Hüener. Iich säig öich – äifach, aber soumeessig guet.
graagled voll = übervoll
bääie = rösten
Äierinankche = Spiegelei
