Doo zäigt sich halt wiider, wär as cha dureheeben und durebysse. Im 1995, dört no bii der FDP, hed är s erscht Mool z Bäärn müese d Nazionaalroots-Bank ruume. Druufaabe hed är wäidli d Sytte gwächslet und isch es Stück mee nach rächts, zue der SVP grütscht. Sächzää Joor spööter hed iin s Volch denn nümm wellen und är hed wiider müesen Apschiid nee vo Bundesbäärn. Jetz isch er zrugg und wie. Noodäm der
Caspar Baader z Bäärn der Bättel aanegheid hed, stoot dä zeechi Maa, wo bii de Schnitränze huust, baraat wie der Winkelried, zum s dritt Mool in d Lücke z springe. Ganz unäigenützig, numme der Bartei z lieb, wien är säit. Das isch halt non e Bolitiker, wo us rächtem Danneholz und nit us ussländische Diilebrittli gschnitzt isch.
wäidli = eilig
Schnitränze: Übername für die Bewohner von Titterten
