Doo häissts immer, öisi Landröötyynen und Landrööt döigen in de Summerferien uf dr fuule Hut ligge. Alles dummschäibe Züüg. Nääme miir zum Byspill der Landroot vo de Weiechöpf. Dä schloot sich, statt nöime go uuszspanne, mit Hamperchsmannen ufere Boustell umme, as d Grüschtstangen und Gaarette numme so im Züüg ummefliege. Oder d Landrootsbreesene us Lause. Nüt do mit rueig am Strand sünnele und der Buch blangge. Sii händled wääge falsche Mieter und Bedryybige, wo, säit ämmel sii, käini syy. Jetz wärde die zwöi in alle Zyttige ummegschläifft und duur e Gaggoo zooge. Isch daas jetz der Dank, as sich d Politiker daagdääglig und ganz unäigenützig für öis yysetze?
Düüfelsdankch = Undank
Weiechöpf = Übername für die Bewohner von Binningen
Hamperchsmanne = Handwerker
