Joo, es hed schon e mängi Faanen uf der Sissecher Flue gwäit. Iich mäin jetz aber nit d Bierfaane vo de Durner vom TV Sissech, wo sii amme noonem Altjooreshock uf der Fluh gha häi. Iich schwätz vo de Faanen us Stoff. 1969 häi d Geegner vonere Fusiion mit de Bebbi e Baaselbieterfaane über d Fluewand apghänkt. Dreiezwänzg Joor spööter häi die, wo geege d Umfaarig Sissech gsii syy, e Näi-Huudel, wo usgsee hed wien es ungwäschnigs Lyynduech, an d Fluewand ghänkt, bis d Umfaarigsfründ cho syy und de Huudelfaane-Patriote uf e Grind gee häi. Allewyyl isch uf der Fluh e Schwyzerfaane gfläädered, wo äim mit de Jooren e chlyy voorchoo isch, wien e usglyyredi Barchedunderhoose. Letschti Wuche häi jetz e baar Fusioons-Hoosesäicher wiider e groossi Baaselbieterfaane über dä Felsen aabeghänkt, wo aber e Daag spööter scho wiider ewägg gsii isch. Wenn iich eerlig bii, isch miir d Bierfaane vo de Durner halt scho die Liebschti gsii.
Hudel = Fetzen
fläädere = flattern
