Jä nundefaane. Sy miir Baaselbieter jetz scho fusioniert, ooni as öpper gmerkt hätti. Iich bii nämmlig zimmlig verstuunt gsii, won iich das chlyyne Wäärbe-Büechli glääse haa, wo imene Heftli gchläbt isch. Joo richtig, mit so gruusigem Lyym, wo äim an de Chlööpen isch blyybe hange. In däm Heftli – vonere Firmaa, wo Hutgreemen aabietet, as d Fraue käini Rümpf überchömme – hets Wandervoorschleeg ghaa. Äin dervoo isch vo de Wääiemüüler zue de Dannezäpfesuuger gange und hed ghäisse: «Im Herzen des Basler Juras». Ahaa, han iich dänkt : S Föiflyyberdaal ghöört jetz aso zum Baasler Jura. Nääbenyyne – d Firmaa, wo das Büechli uusegee hed, isch z Dütschland.
Wääiemüüler und Dannezäpfesuuger = Necknamen für die Bewohner von Bubendorf und Reigoldswil
Föiflyyberdaal = Fünflibertal – Tal der Hinteren Frenke mit den drei Dörfern Bubendorf, Ziefen und Reigoldswil, das zirka 25 Kilometer ausserhalb Basels liegt
