Woorschyynlig ischs en Ooberbaaselbieter-Rammel gsii, wo am Faasnechts-Cortège z Baasel mit zwee Söiblootere am Läiterwäägeli mitgloffen isch. Äidwääder hed dä guet Maa nit gwüsst, as z Baasel an der Faasnecht s mäischt us Blaschtig oder Gummi isch oder er hed welle d Bebbi waarne. Waarne, as noon er Fusioon zwüsche de Baasler und Baaselbieter Faasnächtler underäinisch nummen no Chluuri mit Söiblootere, Gülleschlüüch oder Windebrittli mitmache und d Waggis statt Sürchrütt-Waggis underäinisch Schoorechäänel-Gniempi häisse. Aso, näämed öich in Acht, wenn diir nit wäit, as d Baasler Faasnecht vo so apsunderlige Gstolte underwandered wird. Und: Dracktöör us em Baaselbiet gits au käini me, denn chönni die glatte Sieche vo Waggis luege, wie sii iiri Wääge zie!
äidwääder = entweder
Windebrittli = Knebel zum Spannen der Winde
