Aso jetz häi sy z Bäärn oobe volländs es Näggi im Chienspoon. Jetz will doch s Bundesamt für Umwält (Bafu) de Jeeger verbiete, Fotifalle im Wald ufstelle. Derbyy sy deere Falle für d Grüenchittel soumeessig wichtig. Soo häi sii nümme stundelang in der Chölti müese hocke. Sii häi chönne uf der Foti gsee, wos Wild duuretschalped isch, dört denn chönnen aanehocken und der Sunndigsbrooten apschiesse. Die vom Bafu gseie daas natüürlig e chlyy anderscht. Die häi nämmlig Angscht, as bii deene Fotifalle au Möntsche apgfotigrafiert wärde – Dateschutz und esoo! Wenn me jetz aber lenger überläit, isch die Aawyysig us Bäärn gar nit so babbedüpfig. S chönnt jo bassiere, as iich im Wald bii sonere Fotifalle apgfötelet und noochaane zum Abschuss freigee wird! Guet häi miir die z Bäärn, wo luege as dii niemer übere Huffe schiesst.
Näggi im Chienspoon = Knick in der Fichte oder Sprung in der Schüssel
babbedüpfig = ungeschickt
