Ischs öich au scho ufgfalle: d Politiker und anderi hööchi Dier wärden alsfott vergässliger. Guet, die chömme halt au ins Olter und häi gar e huffe um d Oore. Die seckle doch vo äiner Sitzig zue der andere – dorum häi die allwäg au son e dicks Sitzlääder. Müese de Zyttigs-Fritze druufraabe Uskumft gee. S Hinderscht fürsi cheere. Do cha schon emool öbbis im Vergäss blyybe. An jeede Brunz chönne die schlussemänd au nit dänke. S Bsundrig bii däm wyttverbräidete Vergässen isch numme, as die arme Tschoope mäischtens verschwitze, weeles Gäld as iine, und weeles nit iinen isch.
im Vergääss = aus Vergesslichkeit
Tschoope = bedauernswerte Menschen
