Velicht isch öich das au scho bassiert. Diir häit Gescht yyglaaden und öbbis Guets gchocht. Statt as men am Disch über s guet Ässe, der süffig Wyy und d Politik diskutiert, dräit sich s ganze Gsprööch um Lääbesmittel-Unverdrääglichkäite. Der äint isst käini Nuudle und käi Broot me, will er schyyns d Gluete nit verdräit und schuurig müesi go pföikche. En anderi schüücht der Chees, will sii s Gfüel hed, sii häigi e Laktoseintoleranz. Aber s Bescht chunnt no: Do säit doch son e Gumsle, wo vier Chatze dehäi hed, sii fueri iiri vierbäinige Liebling numme no mit gluetefreiem Chatzefuetter. Jetz goots allwäg nümm lang und de darfsch em Iigel numme non es Dällerli mit entfetteter, thäiländischer Kokosmilch voruuse stelle.
Chlütteri = Durchfall
pföikche = Darm entleeren
