Diir häit öich sicher au scho gfroggt, was der Schutt-Scheff vo de Baasler für e Rasierapperaat het. De gseet jo mängisch uus, wenn er amme wie halberlätz an der Syttelinie ummediigeret, as weeri er grad us em Näscht gheit. D Hoor hangen iim aabe wie Butzfääde und d Backe vo dem guete Maa gseien uus, wien es ungmäits Wäizefäld. Dank der Jumpfere Wernli vo der «baz» wüsse miir aber, worum de Maa es son es Stüfelfäld im Gsicht hed. De rasieri sich schyyns nummen öbben all zää Dääg. Aber das isch jo no nüt. Wenn iich der Schutt-Scheff vo YB aalueg, brucht de allwääg zwüschenyynen en Apschlaage, as er wiider es Gsicht wien es Chinderfüdle het.
Stüfelfäld = Stoppelfeld
Apschlaage = grosses Schlagmesser
