Gschniigled sy d Frau und iich in der fürnääme Wirtschaft gsässen und häi uf s Ässe gwartet. Miir häi es «Menu Surprise» bstellt – mit allem Drumm und Draa. Wos Frölläin mit em erschte «Gang» aanegschwäbbt isch, han iich scho soumeessig Chooldampf ghaa. D Däller sy gattlig aagrichted gsii – nit vill, derfür schöön. Won iich ha wellen afo ässe, hed s Frölläin afo ufzelle, was alles uf em Däller isch: «Gröichti Chrottelääbere ufmene Bett vo jungfröilichem Chatzewaadel» – iich ha wellen afo ässe – «mitere Curry-Chruttstiil-Emulsion» – iich ha wellen afo ässe – «und 82-jöörigem nepalesischem Yakchees, yygläit in Kameelmilch» – iich ha wellen afo ässe – «derzue im Burgermäischterli marinierti Radyysli mit Bröche vo maritimem Dieffseeschwumm» – iich ha wellen afo ässe – «und Reedli vonere Gyraffe-Bluetwurscht.» Iich ha käi Hunger me, derfür Oorewee ghaa.
Heerenässe = reichhaltiges, opulentes Essen
fürnääm = vornehm
