«Chumm emol cho luege. Die ganzi Duschi isch voll Chalch». Wenn das my Frau zue miir säit, wäiss iich, jetz verdräits nüt. Iich gsee mii scho, wien iich wien e Hööleforscher, uf de Chnüü und mitere Stirnlampen an der Chürpse, in d Duschi yynechrääsme. Aarig. Der Daag vorhäär han iich no nüt vo Chalch gsee und jetzt set underäinisch die ganzi Duschi voll dervoo syy? My Frau hed miir aber gläitig d Hüener yydoo und zäigt, wo der Chalch hockt. Nämmlig in de Chlimse vo de Blättli. As Stroof han iich müese mitemene Zaanbürschtli der Chalch us de Chlimse chratze. Das hed mii e chlyy an d Regrutte-Schuel gmaant. Numme isch dört der Oberlütnant e Maa gsii.
aarig = eigentümlich
Chlimse = Ritze
