Es bassiere no Wunder

Es Wunder! Nit so äis, wo der Baabscht öbber duet häilig spräche. Näi, äifach es chlyys Wunder, wo äim s Lääben e Stück wytt erlychtered.
Vor zää Joor han iich jo schon emol geschriibe, was für en übelzyttigi Sach as es isch, in der Chuchi mit der Klaarsichtfolie z handiere. Wettsch iggs e Schniifel Schunggen oder e Mocke Chees yypacke, ändet daas in de mäischte Fäll mit emene Närvezäämebruch. Sone Flängge vo deere Folien apzrysse, isch nämmlig gar nit äifach. Äntwääder ryssts äim d Chlööpen uuf oder es verwurschtled äim dä Fätze.
Allem aa hed das «Folie-Massaker» au die Verantwortlige vo Betty Bossi zum Dänken aagreggt. Die häi nämmlig e baar Joor spööter en Apryss-Voorrichtig baschtled, wo de d Folie mit emene feschte Chlapf hesch chönne duureschnyyde. Aber au das Yygricht isch nit würklig duuredänkt gsii. Bluetigi Finger hesch diir bim Aprysse käini me ghoolt, derfür hets der sen yygchlemmt. S Guete draa isch, ass de käini bluetstillende Medikamänt me hesch müese nee, derfür hesch in der Wuchen öbbe en Duube «Unguentolan-Salbi» bruucht.
Aber jetz isch me der Löösig vom fachgrächten Aprysse von ere Klaarsichtfolien e guets Stück nööcher choo. My Frau hed vor e baar Wuche s nöischt Folien-Apryss-Modäll häibrocht. Äigedlig äifach, aber me mues halt drufchoo. Iich ha zerscht emol kritisch gluegt, wil iich jo scho s äint oder ander mit denen Apryss-Voorrichtige duuregmacht haa.
Süüferlig zien iich, immer under Beobachtig vo der Frau, wo mit der Notfallkuffere baraat stoot, e Flängge vo deer Folie vo der Rolle und faar mit der Schnyydvoorrichtig äinisch hii und här. Und, es Wunder, d Folien isch ap. E suubere Schnitt, ooni ass my Liebschti s Verbandszüüg bruucht oder ass iich in der Däubi d Folie-Rollen an d Wand bängle.
Jetz cha me sich natüürlig scho frooge, worum as daas sone soumeessigi Lengi goot, bis öbber uf die Idee choo isch, e gschyydi Apryss-Voorrichtig uf e Määrt z bringe. Aber, wär wäiss? Woorschyynlig hed d NASA bi der Entwicklig vo deere nöiartige Voorrichtig d Finger drinn ghaa. Hätte nämmlig iiri Aschtronaute bim Uufrysse vomene Briefli Drochemoolzytt glyych lang wien iich bim Aprysse vom ene Stück Folie, weere die arme Kärli im Wältall lengschtens verhungeret.
Äinewääg. Jetz macht s Wärchen in der Chuchi wiider mee Fröid. IIch mues mii (fascht) nümmen uufreege, ha käini bluetige Fingerbeeri me und au my Liebschti chunnt wiider gärn in d Chuchi, ooni ass iiren e Rolle Klaarsicht-Folien um d Oore fliegt. Iich chas doo jo sääge: Ich stand znacht, wenn iich nit cha schlooffe, uuf, gang in d Chuchi, ryss es Stück Folien ap, gang wiider zrugg ins Bett und schloof friidlig yy.