«Ich möchte mal die Serviertochter kennen lernen, die all ihr Trinkgeld versteuert», säit der Mitgründer und Däilhaber vo der Helvetische Bank – en eehemoolige Sissecher – in der «SonntagsZeitung» vom letschte Wuchenändi. Äntlig säit äine, wo d Haddlen im Pfäffer lyt. Nit gnueg, as die Servierfrölläin e soumeessig groosses Gnams häi. Näi, die verstüüren allwäg nit emool s ville Drinkgäld, wo sii zwüschenyyne vo den aarmegnössige Bänker überchömme – wenn sii denn öbbis überchömme. Es isch halt scho guet, as no Lüt git, wo den anderen e chlyy uf d Finger luege. D Gfoor derbyy isch halt, as me vor luuter uf die andere luege fascht e chlyy chönnti vergässe, was d Bruefskolleege so ummechüngele.
Haddle = weibliches Kaninchen
Gnams = genau bestimmter Lohn
