Der Momänt isch nit würklig glücklig gweelt gsii, aber henu. Miir häi nämmlig die letscht Wuchen e nöi Häizig yybout überchoo – binere Ussedämperatur vo föif Graad. Im Chäller isch gfuerwärchet worden und oobedraa häi miir an Ranze gfrore. Wie zu Gotthälfszytten ischs bi öis dehäi en Affechelti gsii. My Frau hed die baarchigen Underhoose füregnoo und isch die ganzi Zyt, drotz emene wullige Schlüttli, mit Hüenerhutt ummegloffe. Hesch d Fäärnbedienig vom Fäärnsee in d Händ gnoo, hets dii soumeessig an d Dööpe ghurniigled. Öbbis Guets hed die Froscht-Üebig aber äinewääg ghaa: Miir häi öis schon emol chönnen uf d Energiewändi voorberäite.
tschuudere = frösteln
Schlüttli = Jäckchen
