Was sy daas denn efange für Zueständ? Jetz sy z Sissech Gmäindrootswaale gsii und füfzää Prozänt vo deene, wo sy go abstimme, häi käi Mäinig ghaa. Äitwääder häi sii leer (121), ungültig (22) oder anderi Nääme (92) apgee. Jetz gseet das jo grad e chlyy so uus, as öb die zwee Burschte, wo zur Waal gstande syy, für e Huffe nit weelbar gsii weere. Derbyy sy beed no zimmlig gattligi Fääger und wäi jo numme s Bescht für Sissech – für d Kunschti, d Baadi, äifach für alles. Ändi Mooned gits e zwöite Waalgang und denn chunnts, wies mues: Haa döie miir äinewääg äin vo beedne, au wenn me leer oder ungültig yyläit oder gar öbber anders uf e Zeedel schrybt.
äitwääder = entweder
Fääger = Kerl