Der Noldi fröit sich schampaar uf e Sissecher Banndaag, will er dört wiider äinisch nummen under Manne cha syy. Joo, für die wos immer noonig wüsse: z Sissech müese d Fraue bim Bannstäinoochelaufe dehäi blyybe. Worum sich der Noldi so verrukcht fröit? Fäärn isch er amene Banndaag nöimen im Underbaaselbiet yyglaade gsii. E riise Tschuppel Fraue, Manne, Chinder und Hünd syy dört der Gränze nooche gloffe. Biim Zvierihalt syy alli wie die Verrukchten uf d Disch zuegstürmt und häi sich e Blatz reserviert und s Zooben uuspackt. Hed öbber anders, zum Byspiil vomene andere Quartier wellen aanehocke, häi d Vättere der Yydringling giftig aagluegt und d Fraue häi afoo giftelen und iires Revier wie Gluggere, mit usgfaarene d Chrallen, verdäidiget. Nääbenusse hed äin vo der Bürgergmäind Würscht bröötled, isch aber uf syyne Würsch blyybe hocke, will die mäischte s Ässe vo dehäi mitgnoo häi. Soo, jetz verstöndet diir velicht e chlyy besser, worum der Noldi gärn z Sissech an Banndaag goot.
schampaar = unerhört
