Der Noldi hed sich überläit, z Chnoobloch* as Gmäindroot z kandidiere. Er hed s Gfüel ghaa, er heebi s rächt Alter und syg none ganz e Gattlige. Denn isch er scho äinisch imenen andere Dorf Gmäinibreesi gsii und hed sich – e wyttere Vordäil wien er gmäint hed – z Lieschtel unden uf der Kantoonsverwaltig beschtens uuskennt.
Lang hed er drüber ghirnt, wien er daas mit syyner Kandidatur sell aagattige? Wär iin chönnt understütze? Won er – politisch gseh – chönnt undere choo? Für daas mues me wüsse, ass z Chnoobloch e chlyyn es politischs Chrüüsimüüsi heerscht. Dört gits usser den üblige Barteie no zwoo Gruppierige – und die wäi alli e mögligscht groosse Schniifel vom Ämtli-Chueche.
Biim Zäämeschluss vo de bürgerlige Barteie hed sich der Noldi, wo Mitgliid gsii isch binere Volchsbartei, nit welle zuecheloo. Wil dört zwee s Sääge ghaa häi, won er mit ene s Höi nit uf der glyyche Büni ghaa hed. Die Lingge syy natüürlig au nit in Froog choo. Mit deene Wältverbesserer hätt er allwääg glyy emool äinisch Chritz ghaa. Soo syy numme no die beede Gruppierige fürbliibe. Bi der äinte Tschuppele, die wo z Chnoobloch fascht e chlyy s Sääge häi, häi sii iim dütsch und dütlig klaar gmacht, ass sii käine vo der rächte Volchsbartei understütze – au wenn d Barteizueghörigkäit uf Gmäindseebeni nit würklig wichtig isch. Soo isch schlussemänd numme no die ander Glygge übrig bliibe. Die Halbbürgerligi-Druppe, wo der Noldi süüferlig aaböbberled hed, isch erscht vor noonig so langer Zytt uf d Bäi gstellt worde, wil sii mit de Richtig-Bürgerlige, bsunders mit de beede Verantwortlige, Mäis ghaa häi. Aber au dört isch der Noldi apblizt. Au sii nääme niemer, wo vo ganz rächtsusse chiem. Worum daas soo isch, hed der Noldi nie würklig uusegfunde. Äinewääg. Schlussemänd isch er mit leere Händ oder besser gsäit häimetloos doogstanden und hed sich gwunderet, öbs z Chnoobloch ächt numme so rääbled vo Gmäindroots-Kandidate.
Wils de Halb-Bürgerligen und Richtig-Bürgerligen aber glyych nit rächt wool gsii isch; und der Noldi jo käi Ungschickten isch, häi sii iim voorgschlaage, glyych emool aazdraabe, ass sii chönne loose, waas für e Kärliburscht er isch. Daas isch jetz aber em Noldi schon e chlyy schreeg yynechoo. Äigedlig hed er nit welle syys halb Lääbe vor e baar Göiggel uusbräiten und het denn nome Rung entschiide, das mit em Gmäindroot lo z blyybe.
Der Noldi hets dunkt, jetz chunnts allwääg uuse wie albe: Me weelt nit öbber wo me will, näi, me weelt öbber, wil me der ander nit will. Und soo chas bassiere, ass sich underäinisch e Gugger im Gmäindroots-Näscht bräit macht, e chlyy mit de Flügel fläädered und denn ums Ummeluege wiider dervoofliegt.
* Der Naame vom Dorf im Ooberbaaselbiet isch em Schryyberling glöifig.
