E chlyy versteckt hinder emene Baum isch e Glygge Buebe gstanden und het e «Joint» ummegee. Iich ha mii no gwunderet, worum as so Hoosesäicher – die Bürschtli syy höchschtesn dryzääni gsii – am zwöi zmidaag, daas woorschyynlig, bevor sii wiider in d Schuel gange syy, Haschisch rauche. Wo äin vo dene Milchbubis, will er allwäg e z dieffe Zug gnoo hed, wien e Verruckte hed afo bleeschte, isch miir yygfalle: Halt. Won iich in däm Alter gsii bii, häi miir au häimlig graucht, bis miir häi müese chöörple. Numme häi miir sälbetsmool statt Haschisch Niele gflemmt. Soo ändere halt d Zytte.
Niele = gemeine Waldrebe
bleeschte = husten
