Iich han em Noldi immer gsäit, er selli hindedruff lääse. Lääse, waas alles für Schnääflede und gruusigs Züüg in dene Fertig-Mönü syygi. Öb irgend son e Grüüsel e Schnääfel vomene apgändigen Okapi in d Fertig-Hamburger gwurschtled oder e Schniifel Pavianfüdle in d Fertig-Bolognese gschmuggled hed. Joo, er häigi scho glääse. Numme nützi daas jo nüt, wenn son e Laaferichäib anstatt Fläisch, soo wies uf der Verpackig hindedruff aagee syygi, d Ravioli mit Hoobelspöön fülli. Aber alles halb so schlimm. Scho syy Ätti häig d Chuemilch vom äigene Hoof öbbe zwüschenyyne mit emene zümftige Gutsch Wasser gstreckt – do syygi ämmel au niemer gstorbe.
Schnääflede = Abfall
Hoobelspöön = Hobelspäne
